الدليل التاريخي للحصول علي فيزا السياحه لأمريكا
اولا خطوات التقديم علي فيزا السياحه لامريكا
اول خطوة هتتصور صور مقاسها 5 * 5 بخلفية بيضاء بدون اي تعديل او فوتوشوب
بعد كدة هتملا ابليكيشن التأشيرة اللي اسمه ds 160 من الموقع دة
الابلكيشن عباره عن 5 صفحات كامله بيسألك عن كل فتفوته في حياتك تقريبا
عن بياناتك وبيانات والدك و والدتك و شغلك و تاريخ سفرياتك وكل حاجه
وبعد ما تخلص الابليكيشن هيظهرلك ورقة ببياناتك وصورتك وباركود اطبعها
وهتاخدها معاك السفاره
بعد كدة هتعمل اكونت على الموقع ده USTRAVELDOCS
هيطلعلك ورقة اسمها "قسيمة إيداع رسوم طلب التأشيرة" عليها رقم ليك
الرقم دة بنسميه رقم CGI
اطبعها وروح بنك CIB عشان تدفع تمن التاشيرة دلوقتي ب 2800 جنيه
وهيديك فى البنك ايصال بالدفع حافظ عليه عشان هيطلب منك ف السفاره
و صلاحيه الوصل دة سنه كامله
بعد ما تدفع الدفع بتاعك بيتفعل بعد 24 ساعه وبتدخل ع الموقع وبتدخل الكود بتاعك
و بيظهرلك المواعيد فى السفارة المتاحه وبتختار المعاد اللي يناسبك و تطبعه
وتروح بيه السفاره
.
يبقي كدة عشان نلخص الموضوع الورق ال هتروح بيه السفاره :
1- صفحه الابليكيشن الى فيها بياناتك وصورتك وباركود
2- ايصال دفع فلوس التأشيرة CGI
3- صورتين شخصيتين
4- ورقه المعاد بتاعه المقابله ال طبعتها
مقابلة السفارة
اهم ورقتين هتحتاجهم ف المقابله ( لو طلب يشوفهم طبعا )
هما كشف الحساب و الاتش ار ليتر
تظبطهم ازاي بقي ؟ اقرأ البوستات بتاعتي دي كلمه كلمه و نفذهم من غير تجويد ..
ابوس ايدك نفذ كلامي من غير تجويد ولا تحط التاتش بتاعك
1- ازاي تظبط كشف الحساب
2- ازاي تظبط الاتش ار ليتر
عوامل فيزا امريكا الاساسية :
1- توفيق ربنا سبحانه وتعالي
2- سبب قوي للذهاب
3- سبب قوي للعودة
اولا : سبب قوي للذهاب :
الحاله الاولي : لو هتسافر سياحة عادية وانت بتشتغل وخريج ومتجوز
هتقدم لوحدك من غيرها ( الستات ميزعلوش ) ومن الافضل انك تكون سافرت كذا بلد
قبل كدة عشان تدعم موقفك
و في الابلكيشن هتختار ولايات سياحيه زي فلوريدا أو نيويورك.أو كاليفورنيا .
وفي الابلكيشن في خانه عن ايه الاماكن ال هتزورها هناك ..
ادخل علي النت جمع معلومات عن الولايه ال هتروحها واكتب اهم المعالم السياحيه
واحفظها كمان ف بالك عشان لو سألك عليها ف الانترفيو
اما لو اعزب فهتكون نفس الخطوات ولكن هتكتب بدل اعزب هتكتب في الابلكيشن
في خانه الحاله الاجتماعيه others وفي المقابله تقوله انك مخطوب لو سألك
وتقوله انك هتتجوز اخر السنه باذن الله
الحاله التانيه :
لو هتسافر سياحه عاديه بس انت طالب / طالبه :
الاحسن ان والدك أو والدتك يقدموا معاك كمرافق .. بحجه انكم هتتفسحوا سوا ..
وانت لسه معندكش خبره وهما هيبقوا الليدر بتاعك ..
و يا سلام بقي لو والدك او والدتك سافروا قبل كدة تبقي في الجون دي
وفي الحاله دي اوعي تقدم كشف حسابك .. الاحسن قدم كشف الحساب بتاع والدك
أو والدتك .. وطبعا بما انك طالب هات شهادة قيد من جامعتك وخليه معاك
الحاله التالته :
لو هتسافر سياحه عاديه وانتوا زوجين وعندكم اولاد :
فهتقدم انت و مراتك وتسيب اولادك
ونقطه مهمه تقدموا في موسم دراسه / امتحانات الاولاد .. هتقولي ازاي ؟
هقولك مهو مفيش عيله ف التاريخ بيكونوا العيال واخدين اجازة وامهم وابوهم هيسافروا
اجازة ومش هياخدوا عيالهم معاهم .. مفيش حد بيعمل كدة
لان اولريدي هتكونوا كلكم اجازة .. يبقي هتفسر ازاي للقنصل انك مش راضي تاخد عيالك معاك اللي هما عندهم اجازة للاجازة ال انت طالبها ؟
لكن لما تقدموا انت و مراتك ف وقت مدارس وامتحانات للعيال هيبقي التفسير انكم
عايزين تقضوا يومين حلوين بعيد عن دوشه العيال وقبل ما الامتحانات بتاعتهم ما تكبس
كمان في سؤال مهم جدا القنصل بيسأله في الحاله دي وهي انتوا سافرتوا ( مع بعض )
و ركز اوي ف كلمه مع بعض قبل كدة فين ؟؟
يعني ميكونش جوزك سافر كل بلاد كوكب الارض وانتي مسافرتيش خالص وتقدموا ..
علي الاقل تكوني سافرتي معاه ولو سفريه واحدة مع بعض
طيب يا سيدي نفترض خدنا الفيزا .. العيال هنعمل فيهم ايه ؟؟
حضرتك لو خدت الفيزا هتاخدها وتسافر انت والمدام وتنبسطوا ولما ترجع
هتقدم للعيال ع الفيزا علي اساس ان العيال خلصوا امتحانات خلاص وهيسافروا معاكم
المرة الجايه
طيب افرض عايزين نقدم كلنا اسره كامله نعمل ايه ؟
الاسر الكامله انت وحظك .. بختك يا ابو بخيت حرفيا
في ناس اترفضوا بالكامل ..
وناس اتوافق عليهم بالكامل ..
وناس وافقوا علي تأشيرات الاب والام ورفضوا العيال ..
وناس وافقوا ع تأشيرات الاب والام و عيل من العيال و رفضوا العيل التاني عشان يكون
رهن للاب والام انهم يرجعوا
الحاله الرابعه :
لو هتسافر حضور مؤتمر وهنا تركز معايا اوي لان دي تجربتي الشخصيه
عشان المؤتمر يبقي مصدر قوة بالنسبالك لازم تتوافر فيه الشروط الجايه
1- يكون مرتبط ارتباط وثيق بتخصصك ..
يعني متكونش دكتور وتبقي عايز تروح مؤتمر عن ال IT مثلا .. مينفعش
او تكون دكتور اسنان مثلا وعايز تحضر مؤتمر لبيطري!! برضه مينفعش
.
2- يكون المؤتمر مدته يومين او 3 ايام مش اقل من كدة .. يعني ميكونش يوم ..
لان مفيش حد هيسافر مسافه 13 ساعه علي اقل تقدير عشان يحضر مؤتمر يوم واحد
3- يكون المؤتمر له اسم كويس وبينعقد كل سنه في نفس المعاد ..
يعني ميكونش اول مرة ينعقد .. يكون له تاريخ وهيستوري كويس
4- نقطه قوة جدا بالنسبالك لو كنت سبيكر رئيسي ف المؤتمر
ايه الفرق بين السبيكر وبين الحضور العادي ؟؟
الاسبيكر بيبعت للمؤتمر ويعرض عليهم ابحاثه في المجال اللي هيتناقش فيه المؤتمر
ولو المؤتمر وافق علي البحث بتاعك بيبعتلك دعوة عشان تشارك كمتحدث رسمي
وبتكون دعوة متوثقه
اما الحضور العادي فأنت شخص هتدفع فلوس مقابل حجز مقعد .. يعني هتحضر بفلوسك
من غير اي ابحاث .. مجرد مستمع ومشارك فقط
وهنا لو حبيت تشارك كمستمع عادي هيبقي فيه انواع للتذاكر حسب عوامل كثير ..
هل انت خريج ولا طالب .. هل جاي من الاتحاد الاوروبي ولا من بره الاتحاد ..
هل شاركت ف اعمال المؤتمر قبل كدة ولا لأ
وعلي اساسها بيتحدد السعر اللي غالبا بيكون ما بين 250 دولار ل 1000 دولار
ولما بتدفع وبتأكد الدفع بيتبعتلك دعوة رسميه لحضور المؤتمر
السؤال ال اكيد كلكم هتسألوة وانا اجيب مؤتمر في تخصصي بالمواصفات دي منين ؟؟
بكل بساطه هتدخل ع الموقعين دول
1- الموقع الاول
ودة بتبحث منه علي المؤتمرات بحسب الولايه
2- الموقع التاني
ودة بتبحث منه علي المؤتمرات بحسب التخصص
طيب افرض انت سكربت رايتر او فنان رسام مثلا مش هينفع معاك المؤتمرات
لكن هتنفع معاك المعارض الدوليه ال بتعملها امريكا
وطريقه البحث والتقديم ع المعارض بنفس الطريقه وهتلاقيهم كلهم علي جوجل
2- سبب قوي للعودة :
يأما تكون وظيفه قويه مش هتقدر تسيبها وتهرب ولازم هترجع عشانها ودي بيتم اثباتها
انك تكون شغال في مكان له اسم قوي سواء حكومي او خاص
وممكن الاسم يغني عن الاتش ار اصلا تخيل
يأما تكون متجوز ومخلف ولازم ترجعلهم ومش هينفع تسيبهم هنا
يأما تكون دراسه لازم تكملها هنا سواء بكالريوس او ماستر ولازم ترجع
والا تعب سنين دراستك هيروح عليك
يأما تكون وحيد ابوك و امك وهما كبار جدا في السن ومش هينفع تسيبهم لوحدهم
يأما ودي حاله ضعيفه ان يكون عندك املاك وعقارات بس مش بيعتدوا بيها اوي
لان سهل تعمل توكيل لحد وتبيع املاكك كلها وتخلع
تفاصيل يوم المقابله :
هتروح قبل معادك بساعه .. هتلاقي ملايين ع الباب ولا كأنهم بيوزعوا فراخ ..
هتلاقيهم متقسمين طابورين .. واحد للسياحه والتاني للهجره
لما يجي معادك هتدخل من بوابة السفارة على غرفة التفتيش .. هيتاخد منك اي حاجه
معدنيه سواء ولاعه - فلاشات - اي حاجه .. وتليفونك هيتاخد منك ويتسلملك رقم بيه
في الامانات عشان لما تخرج تستلمه بيه
بعد غرفه الامن هتنزل تحت هتقابل موظف مصري هيشوف باسبورك ويديك رقم
الرقم دة اللي هتفضل شغال بيه طول اليوم
هتقعد لغايه لما يندهوا علي رقمك علي شباك معين هتروح عشان تسلم باسبورك
و ال ds160 وبعدين هيندهوا عليك للمرة التانيه عشان تبصم البصمه بتاعتك علي الشباك
وبعد كدة هييجي دورك تانى فى الشباك الى جنبه عشان تستلم باسبورك والورق
الى هما خدوه منك
واخيرا هتعد بقى تستريح عشان تستنى دورك فى المقابلة مع القنصل ودي اخر مرحله
ممكن فتره الانتظار دي تبقي دقائق او نص ساعه او حتي ساعه انت وحظك
وهناك هتلاقي حمام و كافيتريه وهتدلع نفسك يعني متقلقش
لما يتنده ع رقمك لاخر مرة هتقابل القنصل .. هما بيكونوا 15 شباك ..
المقابلات بتكون من شباك 9 لشباك 15 .. انت وحظك
وكل قنصل بيتغير حسب الشيفت يعني مفيش حاجه ثابته
اول ماتدخل ع القنصل هتديله الباسبور والابليكيشن و هيخليك تبصم تانى على جهاز
على الشباك
طبعا انت لما تدخل عليه هتقول صباح الخير او السلام عليكم .. دائما ابدأ انت الخطوة
الاولي وخليك متحكم ف الكلام
لو بتعرف تتكلم انجلش اتكلم صدقني هيرتاح معاك اوي وهيحبك
.
خليك هادي جدا و واثق من نفسك اوي .. وانت بتتكلم عينك في عينه و اتكلم بهدوء
جاااامد و ابتسم
لو انت رايح سياحه فقط .. هيسألك عن :
سافرت فين قبل كده؟؟؟
سافرت امريكا قبل كده؟؟؟
عندك قرايب هناك؟؟؟
رايح فين في امريكا؟؟؟
أشمعني رايح المكان ده؟؟؟
متجوز؟؟؟
عندك اولاد؟؟؟؟
شغال ايه؟؟؟؟
دخلك كاااام؟؟؟
عندك املاك؟؟؟
وريني البنك اكونت بتاعك؟؟
هاتقعد كام يوم هناك؟؟؟؟
هتصرف كام هناك بالدولار ؟؟؟
هي دي الأسأله للسياحه فقط
.
انما لو مؤتمر هيسألك عن دعوة المؤتمر و بتشتغل ايه و ايه علاقه المؤتمر دة بشغلك
و وريني ال CV بتاعك
المقابلة غالبا بتاخد 3 دقايق ( انا قعد معايا 12 دقيقه بحالهم )
لو اتوافق ع الفيزا هيقولك وانت واقف مبروك أو لا قدر الله هيقولك آسف انا مش موافق
لو وافق عليك هيديك ورقة خضراء وهيقولك مبروك وهياخد منك الباسبور
لكن لو لاقدر الله مش هيوافق هيرجعلك الباسبور وهيديك ورقة الرفض ولونها ازرق
ممكن يكون عايز يعمل عليك استعلام امني ساعتها هيديك ورقه صفراء و رقم كيس نمبر
تتابع عليه حالتك من علي موقعهم
اسئلة شائعة
هل التقديم علي اللوتري ممكن تأثر علي قبولي في فيزا السياحه ؟؟
لا مش بتأثر دة برنامج و دة برنامج تاني خالص .. ودي عن تجربه شخصيه قدمت في
اللوتري من سنتين يعني عندي نوايا هجره اهي ولكن مع ذلك خدت فيزا السياحه عادي
احسن وقت للتقديم ع الفيزا ؟؟
لو مؤتمر يبقي في اي وقت مش فارقه
لو سياحه فعلي حسب
1- لو طالب يبقي في الكريسماس بعد امتحانات نص السنه
2- لو زوج و زوجته ومعندهمش اطفال يبقي ف الصيف
3- لو اعزب وبيشتغل / زوج وزوجته وهيسيبوا اطفالهم يبقي ف الربيع او الخريف
.
احسن الولايات السياحيه للعزاب ومقنعه للقنصل هي نيويورك
احسن الولايات السياحيه للزواج فقط هي نيويورك و كاليفورنيا
احسن الولايات السياحيه الأسر والعائلات هي فلوريدا خصوصا اورلاندو
ملحوظه مهمه جدا
لو انت دخلت المقابله وكان ورقك كله كله كله سليم 100% ورفضك ادخل بعدها فورا
باقل من اسبوع هتاخدها بنفس الورق
كل الحكايه انه شاف انك تقدر علي ثمن الفيزا مرتين فحب يعمل سبوبه من وراك ..
-